نوید ظفر کیانی کے تلخ و شیریں کلام کا مرکز

Tag Archives: پاکستان

نویدِ نوبہار دو، مرا وطن سنوار دو
روش روش نکھاردو، مرا وطن سنوار دو

ہر ایک ذرہء وطن میں زندگی اُتار دو
نگارِ لالہ زار دو، مرا وطن سنوار دو

یہ آندھیاں، یہ بادلوں کی گھن گرج، یہ بجلیاں
سکون دو ، قراردو، مرا وطن سنوار دو

جو خود کو جان لیتا ہے، جہاں کو جان لیتا ہے
خودی کو اعتبار دو، مرا وطن سنوار دو

عداوتیں، عصیبتیں، مرے وطن کو کھا گئیں
ہر ایک سانپ مار دو، مرا وطن سنوار دو

خزاں کی چیرہ دستیوں کے سامنے ڈٹے رہو
یہ بارِ غم اُتاردو، مرا وطن سنوار دو

جو برگ ہو سو امن کا، جو گل کھلے سو پیار کا
ہوائےمشکبار دو، مرا وطن سنوار دو

یہ رنگِ رنگ کے ازم تو روک لیتے ہیں قدم
نظامِ کردگار دو، مرا وطن سنوار دو

صفوں میں ایسا نظم ہو کہ کارواں ہو یک بدن
قطار در قطاردو، مرا وطن سنوار دو

نئی نئی بلندیوں کی سمت ہم اڑے پھریں
وہ نقطۂ مطار دو، مرا وطن سنوار دو

قدم اُٹھیں تو نہ رُکیں، بڑھیں تو بس بڑھے چلیں
لہو میں وہ فشادو، مرا وطن سنوار دو

Advertisements

اپنے جوتے اپنے سر کا عجب نظارا پاکستان
اپنے ہاتھوں بنا ہوا ہے ایک تماشہ پاکستان

نیٹو کی بمباری کا ترجیحی خطہ ۔۔۔۔ پاکستان
نیٹو کو ہتھیاروں کی سپلائی کا ذریعہ پاکستان