خانگی زندگی جو فلماتی
ایک ہارر سی مووی بن جاتی

کٹی کرنا نہیں رقیبوں سے
چاہئیے ہوں گے تم کو باراتی

ہو رہا ہے پڑوسنوں کا اکٹھ
کوئی سازش نہیں محلاتی

اُس کے نخرے بھی ہیرو جیسے ہیں
جس کی کیمسٹری ہے جناتی

کیسے آگے بڑھے گی دنیا میں
چل رہی ہے جو قوم لنگڑاتی

آ لیا برشگالِ شامت نے
اورپلے نہیں ہے برساتی

اُس کو تگڑا تو ہونا پڑتا ہے
جس پہ حملہ ہوا ہو سہ گھاتی

باعثِ بلوہ ہیں بہت سی وجوہ
کچھ سوالاتی ،کچھ جواباتی

وہ بھی طوفان بن کے غرائے
جس کی اوقات ہے بخاراتی

Advertisements