لفٹ دیتے نہیں تاہم میرا دل کہتا ہے
وہ سمجھتے ہیں مجھے بم میرا دل کہتا ہے
دانت تو تیز چکن کے لئے کرتا ہوں مگر
میری قسمت میں ہے شلغم میرا دل کہتا ہے
طشت از بام بھی کر سکتی ہے ریحام کوئی
دلِ گستاخ کا البم میرا دل کہتا ہے
جس کو چاہے اُسے ماموں تو بنا سکتا ہے
میرے مونس میرے ہمدم میرا دل کہتا ہے
لوٹا بردار کہے تو میں بھلا کیوں نہ ہنسوں
یہ ہے تبدیلی کا موسم، میرا دل کہتا ہے
میری قسمت میں بہرحال چکن لکھا ہے
وہ ولیمہ ہو یا چہلم میرا دل کہتا ہے
چائے کے کپ پہ وہ طوفان اُٹھا سکتا ہے
لکھنے بیٹھا ہے جو کالم میرا دل کہتا ہے
میرے جیون میں لگانے کے لئے آئی ہے
مارشل لاء میری بیگم، میرا دل کہتا ہے
اِتنے بہرے بھی نہیں ہیں میرے سننے والے
جتنا دشوار ہے گوئم، میرا دل کہتا ہے
دل کی چوٹوں سے مری ناک میں ایسا دم ہے
میں نے کھا لینا ہے مرہم، میرا دل کہتا ہے
Advertisements