بھیجے میں اگراس کے ہو خناس مناسب
کر سکتا ہے وہ اپنا کوئی لاس مناسب

سسرال میں بندہ کبھی خچر نہیں بنتا
مل جائے مقدر سے اگر ساس مناسب

مجنوں نہیں کھوتا کہ کرے لیلیٰ سے شکوہ
ڈالی نہیں جاتی ہے اُسے گھاس مناسب

یوں مل نہیں پایا تھا اسسٹنٹ مجھے موزوں
درکار تھا اس کو بھی کوئی باس مناسب

کر سکتا ہے آ کر کسی چینل سے بھی وہ "تا”
اینکر کو اگر آتی ہو بکواس مناسب

جو سکھیوں کی سنگت میں ہو پکنک کے ٹور پر
کیا اس کے لئے تیرا ہے بن باس مناسب؟

جاں لیوا ہے عاشق کو سلیکشن کی چنوٹی
نگہت ہے یا سلمیٰ ہے یا الماس مناسب؟

عبداللہ سے جب بیر خدا واسطے کا ہو
سوچے گا بھلا خاک ہری داس مناسب

اجلاس در اجلاس کی ڈیٹوں کے علاوہ
اعلامیہ جاری کرے اجلاس مناسب

Advertisements